काँग्रेसमा देउवा नै सभापति, यस्तो रह्यो कोइराला पक्षको मत अवस्था ?
नेपाली काँग्रेसको १४ औं महाधिवेशनबाट सभापति पदमा फेरि शेरबहादुर देउवा विजयी नै भएका छन् । देउवा १३ औं महाधिवेशनमा पहिलो पटक काँग्रेस सभापति बन्न सफल भएका थिए । उनले १४ औं महाधिवेशनबाट पनि भारी मतान्तरका साथ डा शेखर कोइरालालाई पराजित गर्दै सभापतिमा निर्वाचित भएका हुन् ।
मंगलबार भएको मतदानको मतगणना राति सवा ११ बजेदेखि सुरु हुँदा देउवाले लगातार अग्रता बढाउँदै लगेका थिए । मंगलबार दिउँसो ३ः३० बजेदेखि सुरु भएको मतदान निर्धारित समयभन्दा डेढ घण्टा ढिला राति ९ बजे सम्पन्न भएको थियो भने आवश्यक प्रक्रिया सुरु गरे राति सवा ११ बजेदेखि मतगणना थालिएको थियो ।
सोमबार पहिलो चरणमा भएको मतदानमा ४ हजार ६७९ मत खसेकामा मंगलबार घटेर ४६२३ मत खसेको निर्वाचन समितिका एक अधिकारीले जानकारी दिए । काँग्रेसमा कुल मतदाता ४ हजार ७४३ जना भएपनि बाँकी अनुपस्थित भएका थिए । मतपरिणामअनुसार देउवाले २७३३ मत पाउँदा कोइरालाले १८५५ मत प्राप्त गरे । यस्तै ३५ मत बदर भयो ।
