देउवाले गगन थापालाई गरे यस्तो बाचा, एकाविहानै खुसी हुँदै गरे सार्वजनिक
काठमाडौं । अब बालुवाटार स्थित प्रधानमन्त्री निवासमा पार्टीका बैठक नहुने भएका छन् । नेपाली कांग्रेसका सभापति समेत रहेका शेरवहादुर देउवाले पार्टीका बैठक बालुवाटारमा नगर्ने बाचा गरेका छन् । कांग्रेस केन्द्रीय सदस्य गगन थापाले पार्टीको कुनै बैठक बालुवाटारमा नगर्न प्रधानमन्त्री शेरबहादुर देउवालाई आग्रह गरेका थिए । उनले सामाजिक सञ्जाल मार्फत देउवालाई यस अघि हुँदै आएका यस्ता काम नगर्न आग्रह गरेका हुन् ।
जवाफमा प्रधानमन्त्री देउवाले कांग्रेस केन्द्रीय कार्यालय सानेपामा धर्ना कार्यक्रम भइरहेकाले बैठक बालुवाटार राखेको जवाफ दिएको थापाले बताएका छन् । सोमबार सामाजिक सञ्जालमा लेख्दै थापाले अबबाट त्यस्तो नहुने पनि प्रधानमन्त्रीले बचन दिएको जानकारी दिए ।
‘उनले पार्टी कार्यालयमा धर्ना भएको कारणले पहिलो बैठक बालुवाटारमा गर्नुपरेको थापालाई बताएका छन् । आगामी दिनमा बैठक पार्टी कार्यालयमै गर्ने बचन देउवाले आफुलाई दिएको गगनले जानकारी गराएका छन् । पार्टी कार्यालयमा धर्ना भएकाले यो पटक बालुवाटारमा भएको हो,तर जे भए पनि अब देखि त्यस्तो हुने छैन र गरिन्न भन्ने विश्वास दिलाउनु भएको छ’, थापाले भने ।
बालुवाटार प्रधानमन्त्रीको सरकारी निवास भएकाले त्यहाँ कुनै पार्टीको कार्यक्रम गरेको भन्दै नागरिक समाजलगायतले अवाज उठाउँदै आएका छन् । गगन आफै पनि निवर्तमान प्रधानमन्त्री केपी शर्मा ओलीको आलोचना गर्दै आएका थिए । तर कांग्रेसकै बैठक बालुवाटारमा भएपछि त्यसको विरोध हुँदै आएको थियो । देउवाले केही दिनअघि संसदीय दलको बैठक बालुवाटारमा नै राखेका थिए ।
