कांग्रेस र एमालेले दुई थरी चुनावी घोषणापत्र बनाउने
काठमाडौं । सत्तासीन नेपाली कांग्रेस र प्रमुख प्रतिपक्षी दल नेकपा (एमाले)ले केन्द्रीय र स्थानीय दुबै तहबाट चुनावी घोषणापत्र जारी गर्ने भएका छन् ।एमाले केन्द्रीय कमिटी बैठकले केन्द्रबाट चुनावी घोषणापत्र र स्थानीय तहले प्रतिवद्धतापत्र लिएर निर्वाचनमा होमिने निर्णय गरे लगत्तै कांग्रेसले पनि दुई थरी चुनावी घोषणापत्र जारी गर्न लागेको हो ।
एमाले केन्द्रीय कमिटी बैठकले ‘पार्टीको केन्द्रीय कमिटीका तर्फबाट वर्तमान राजनीतिक परिस्थिति, पार्टीका मुख्य नीतिहरू, आगामीमा कार्यदिशा तथा ‘समृद्ध नेपाल र सुखी नेपाली’ को आकांक्षा पूरा गर्न राष्ट्रिय स्तरमा भएका काम र स्थानीय विकास तथा समृद्धिसम्बन्धी हाम्रो परिकल्पना, कार्यक्रम र मार्गचित्र समेटेर घोषणापत्र सार्वजनिक गर्ने’ निर्णय गरेको थियो ।
पार्टी केन्द्रीय कार्यालयबाट चुनावी घोषणा पत्र बनाउने जनाए पनि स्थानीय तहले अलग्गै प्रतिवद्धतापत्र बनाउनु पर्ने निर्णय पनि उक्त बैठकले गरिसकेको छ । ‘केन्द्रीय नीतिको मार्गदर्शन र केन्द्रले तयार गरेको ढाँचामाथि आधारित रहेर स्थानीय तहमा हाम्रा उपलब्धी, हामी पराजित भएका ठाउँमा बिगतमा हामीले गरेको प्रतिबद्धता र विपक्षीले विजय हासिल गरेको कारण त्यसमा आएको अवरोधसमेतलाई समेटेर आगामी लक्ष्य र कार्ययोजनासहितका प्रतिबद्धता पत्र तयार गर्ने’ निर्णयमा उल्लेख छ ।
केन्द्रीय घोषणापत्र निमार्णका लागि एमालेले उपाध्यक्ष ईश्वर पोखरेलको नेतृत्वमा युवराज ज्ञवाली, प्रदीप ज्ञवाली, विष्णु रिमाल, प्रभु साह, देवेन्द्र दाहाल, युवराज खतिवडा, प्रभा बराल, दिनेशचन्द्र देवकोटा, सुशील ज्ञवाली, मनोजजंग थापालगायतको घोषणापत्र मस्यौदा कार्यदल गठन गरेको छ ।
