कर्णाली नदीमा ट्रक खस्यो २ जनाको घटनास्थलमै निधन

काठमाडौ । कालिकोटमा मिनी ट्रक कर्णाली नदीमा खसेको छ । नम्बर नखुलेको मिनी ट्रक कर्णाली नदीमा खस्दा दुई जनाको घटनास्थलमै निधन भएको प्रहरीले जनाएको छ।

दुर्घटनामा ट्रक चालक दीपक साउद र सहचालक ३२ वर्षका रमेशबहादुर शाहीको निधन भएको छ । ट्रक चालकको ठेगाना खुलेको छैन भने सहचालक बाजुराका हुन् । ट्रक चालक साउदको आफन्तसंग सम्पर्कको कोशिष भएको जिल्ला प्रहरी कार्यालय कालिकोटका डिएसपी चक्र शाहीले जानकारी दिए।

कर्णाली राजमार्गमा पर्ने कालिकोटको शुभकालिका गाउँपालिकास्थित एस मोड भन्ने ठाउँबाट ट्रक कर्णाली नदीमा खसेको हो। नेपालगञ्जबाट जुम्ला जाँदै गरेको ट्रक तीव्र गतिको कारण दुर्घटनामा परेको अनुमान प्रहरीले गरेको छ। ट्रक सडकबाट झन्डै ३ सय मिटर तल कर्णाली नदीमा खसेको छ।