प्रदेश १ का मुख्यमन्त्री भीम आचार्यले दिए राजीनामा
काठमाडौ । प्रदेश नम्बर १ का मुख्यमन्त्री भीम आचार्यले राजीनामा दिएका छन्। विश्वासको मत नपाउने निश्चित भएपछि उनले सोमबार प्रदेश सभामै सम्बोधन गर्दै राजीनामा दिएका छन्।
‘मैले सुरूमै राजीनामा दिन सक्थे। तर जनताको बन्धनबाट म मुक्त हुन सकिनँ। कामलाई महत्वपूर्ण रूपमा राखियो,’ प्रदेश सभामा बोल्दै आचार्यले भने, ‘आलोचना गर्नेले पनि सहयोग नै गर्नुभएको छ। म आजै मुख्यमन्त्री पदबाट राजीनामा दिने घोषणा गर्दछु।’ उनले गठबन्धन दलले जसरी बदनियतपूर्वक पार्टी फुटाएर सरकारमा बस्न नसक्ने बताए।
आचार्य हटाउन जुटेका कांग्रेस, माओवादी केन्द्र, नेकपा एकीकृत समाजवादी, जनता समाजवादी पार्टी र संघीय लोकतान्त्रिक राष्ट्रिय मञ्चका सांसदहरुलाई विराटनगरस्थित बिग होटलमा राखिएको थियो।
उनी गत भदौ १० गते प्रदेश १ का दोस्रो मुख्यमन्त्री बनेका थिए। आचार्यले गत कात्तिक ५ गते विश्वासको मतका लागि संसदमा प्रस्ताव पेस गरेका थिए। उनले गत कात्तिक ७ गते संसदमा विश्वासको मत लिने मिति तोकिएको थियो। तर, कांग्रेस र एमाले दुवै दलले संसद स्थगन गर्न माग गरेपछि विश्वासको मत लिन पाएनन्।
अहिले प्रदेश १ मा ९२ सांसद छन्। जसमा एमालेका ४१ सांसद छन्। विश्वासको मत लिन आचार्यलाई ४७ संख्या आवश्यक थियो। विश्वासको मत लिन आवश्यक ६ मत जुटाउन नसकेपछि आचार्य बाहिरिएका हुन्।
विपक्षी गठबन्धनमा ५० सांसद छन्। जसले केन्द्रको सहमति अनुसार एकीकृत समाजवादीका राजेन्द्र राईलाई मुख्यमन्त्री हुन सजिलो भएको छ। प्रदेश १ मा कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३ र संयुक्त लोकतान्त्रिक राष्ट्रिय मञ्चका एकजना छन्।
अर्कातिर एक सिटसहितको राप्रपाले कसलाई सघाउने भन्ने औपचारिक निर्णय लिएको थिएन। प्रदेश १ मा अब गठबन्धनबाट भोजपुरबाट निर्वाचित एकीकृत समाजवादीका नेता राजेन्द्र राई मुख्यमन्त्री बन्दैछन्। आचार्य अगाडि पनि भोजपुरकै शेरधन राई मुख्यमन्त्री थिए।