जब राष्ट्रपतिकै अगाडि माधव नेपालले देउवालाई बधाई दिए …
एमाले वरिष्ठ नेता माधवकुमार नेपालले नवनियुक्त प्रधानमन्त्री शेरबहादुर देउवालाई बधाई दिएका छन् । नेता नेपाल राष्ट्रपति कार्यालय शीतलनिवासमा आयोजित प्रधानमन्त्रीको सपथग्रहण समारोहमा सहभागी भएका थिए । सपथ सकिएलगत्तै नेपालले देउवालाई भेटेर बधाई तथा कार्यकाल सफलताको शुभकामना दिए । नेपाल देउवालाई बधाई दिने पहिलो नेता हुन् ।
देउवाको सपथमा माओवादी केन्द्रका अध्यक्ष पुष्पकमल दाहाल प्रचण्ड, जसपा संघीय परिषद अध्यक्ष डा। बाबुराम भट्टराीई, अध्यक्ष उपेन्द्र यादव, काँग्रेस वरिष्ठ नेता रामचन्द्र पौडेललगायत नेता सहभागी थिए । शपथ समारोहमा निवर्तमान प्रधानमन्त्री केपी शर्मा ओली भने सहभागी भएनन् ।
सामन्यतयाः पूर्वप्रधानमन्त्रीहरु शपथ ग्रहणमा उपस्थित हुने प्रचलन भएपनि ओली शीतलनिवास नगएको बुझिएको छ । शपथ ग्रहण समारोहमा निवर्तमान प्रधानमन्त्रीको उपस्थितिलाई अनिवार्यजस्तै मानिन्छ । तर,आजसम्म सरकारी निवासमै रहेका ओलीले शपथ ग्रहण समारोह बहिष्कार गर्नुलाई जानकारहरुले गैरलोकतान्त्रिक चरित्र भनेका छन् ।
