कर्णाली राजमार्ग दुई दिनदेखि अवरुद्ध हुँदा यात्रुहरु अलपत्र
काठमाडौं,असार २३ । कर्णाली राजमार्ग दुई दिनदेखि अवरुद्ध हुँदा यात्रु अलपत्र परेका छन् । शुक्रबारदेखि परेको अविरल वर्षाका कारण पहिरो जाँदा अवरुद्ध राजमार्ग अझै सञ्चालनमा आउन सकेको छैन ।
राजमार्गको कालीकोट खण्डमा तीन ठाउँमा गएको पहिरो पन्छाउन बाँकी रहेकाले आइतबार बिहानसम्म पनि राजमार्ग सञ्चालन हुन नसकेको हो ।
राजमार्गको दैलेख खण्डमा अवरुद्ध भएको सड्क भने सञ्चालनमा आइसकेको कर्णाली प्रदेश प्रहरीले जनाएको छ ।
कालीकोटको शुभकालिका गाउँपालिका-१, गगने खोला, खाँडाचक्र नगरपालिका-२, उम्ल बजार र तिलगुफा नगरपालिका -६, टिमुरेमा पहिरो जाँदा सडक अवरुद्ध भएको प्रदेश प्रहरी कार्यालयका प्रवक्ता एसपी विनोद शर्माले जानकारी दिए ।
राजमार्ग अवरुद्ध हुँदा सुर्खेतदेखि माथिल्लो कर्णाली र माथिल्लो कर्णालीदेखि सुर्खेत आउने सवारी साधनहरू बीच बाटोमा रोकिएका छन् भने यात्रुहरू अलपत्र परेका छन् ।
