संसदमा गृहमन्त्रीको गर्जन : नक्कली भुटानी शरणार्थी प्रकरणमा तथ्य र प्रमाणले भ्याउनेसम्म अनुसन्धान हुने
काठमाडौं, २३ साउन । उपप्रधान एवं गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा तथ्य र प्रमाणले भ्याउनेसम्म अनुसन्धान हुने बताएका छन् । प्रतिनिधि सभामा आज आफूमाथि उठेका प्रश्नहरुको जवाफ दिँदै उनले मन्त्रालयले प्रहरीलाई तथ्य र प्रमाणले भ्याउनेसम्म निरपेक्ष रुपमा अनुसन्धान गरेर दोषीलाई कारबाहीको प्रक्रियामा ल्याउन निर्देशन भएको उनले बताए ।
‘नक्कली भुटानी शरणार्थी प्रकरणमा त्यहाँ भन्दा माथि किन नगएको ? भन्ने प्रश्नहरु उठेका छन् । हाम्रो स्ट्यन्ड बाई डाइरेक्टिभ छ प्रहरी संयन्त्रलाई । अध्ययन अनुसन्धान र तथ्य र प्रमाणले जहासम्म जानुपर्छ त्यहाँसम्म जाने र निरपेक्ष भएर दोषीलाई कारबाहीको प्रक्रियामा ल्याउने,’– उनले भने ।
कसैलाई कुनै पनि मुद्दामा फलाना दोषी होला भन्ने लागेकै आधारमा कारबाही नहुने उनले बताए । तथ्य र प्रमाणले भ्याएसम्म कोही पनि नछुट्ने उनले बताए ।
‘हामीमध्ये कसैलाई फलाना पनि संलग्न होला, अनुसन्धान त्यहाँ पुगेन भन्ने लागेको होला । तर, सरकार र अनुसन्धान संयन्त्रले लागेको आधारमा गर्न मिल्दैन । तथ्य प्रमाणको आधारमा गर्नुपर्छ । तसर्थ दोषीलाई तथ्य प्रमाणको आधारमा कानुनको दायरामा ल्याउने र कारबाही गर्ने प्रक्रियामा गएको छ,’– उनले भने ।
माओवादी वा कुनै पार्टी होस् अनुसन्धान र तथ्य प्रमाणले दोषी देखाउँछ भने कुनै नछुट्ने उनले बताए । अनुसन्धानमा दोषी पाइएमा कोही उम्किन नसक्ने उनले बताए ।
