प्रचण्ड भन्छन् : ‘एमसीसी अब प्रक्रियाबाट टुंगिन्छ’
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले अमेरिकी सहायता परियोजना एमसीसी संसदीय प्रक्रियामा टुंगोमा पुग्ने बताएका छन् । सोमबार सिंहदरबारमा नेपाली कांग्रेसका नेता रामचन्द्र पौडेलसँगको भेटवार्तापछि अध्यक्ष प्रचण्डले एमसीसी अब प्रक्रियाबाट टुंगिने बताए ।
पौडेलले एमसीसीको समस्या समाधान गरेर सत्ता गठबन्धन जोगाउनु पर्नेमा जोड दिएका थिए । उनले गठबन्धन पनि रहने र एमसीसी पनि पास हुने गरी भूमिका खेल्न प्रचण्डलाई आग्रह गरेका थिए । जवाफमा प्रचण्डले एमसीसी प्रक्रियाबाट टुंगोमा पुग्ने बताएका हुन् ।
तर संसदमा अनुमोदनका लागि समर्थन गर्ने वा नगर्ने बारे केही बोलेनन् । नेता पौडेलले भने एमसीसीलाई फेल गरेर मुलुकलाई आर्थिक र राजनीतिक संकटतिर देशलाई धकेल्न नहुनेमा जोड दिएका थिए ।
