मैले सभापतिमा हारेँ भने प्रधानमन्त्रीवाट पनि हटाउँछन् त्यसैले मलाई जिताउनुहोला : देउवा
काठमाण्डौ । नेपाली कांग्रेसका सभापति एवम् प्रधानमन्त्री शेरबहादुर देउवाले आफूले जसरी पनि सभापतिमा जित्नै पर्ने बताएका छन् । महाधिवेशन उद्घाटन सत्रमा पनि आफुले ओलीको सासनवाट जनतालाई मुक्त गरेकाले आफुलाई भोट दिएर फेरी सभापति बनाउन अनुरोध गरेका देउवाले कार्यकर्तासंग भोट माग्ने क्रममा पनि सोही कुरा दोहोर्याएका छन् ।
आदिवासी जनजाति विभागले काठमाण्डौमा गरेको कार्यक्रममा उनले आफूलाई जसरी पनि जिताउन आग्रह गरेका हुन् । सभापति देउवाले सभापति हारेमा आफूलाई प्रधानमन्त्रीबाट पनि हटाउने भएकाले जसरी पनि जिताउन आग्रह गरे ।
उनले सभापतिमा हारेमा आफूमाथि धेरै प्रश्न उठ्ने र प्रधानमन्त्रीवाट समेत हटाउने भएकाले सभापतिमा जित्नै पर्ने दवाव रहेको बताए । ‘मैले हारेँ भने मलाई प्रधानमन्त्रीबाट हटाउँछन् । त्यसैले मैले जित्नै पर्छ । मलाई जिताइदिनु होला । पार्टीको चुनाव पनि नजित्नेले देश कसरी चलाउँछन् भनेर मलाई प्रश्न गर्छन्,’ उहाँले भन्नुभयो,’ त्यही भएर मलाई सरकारबाट हटाउन सक्छन् । मलाई जिताइदिनु होला ।’
यस्तै, उनले कांग्रेसलाई सबैको पार्टी बनाएर लैजानु पर्ने भएकाले सबै जनजातिलाई आरक्षण दिएको समेत बताए ।
